Is carateristigas de sa terra nosta si permitint a manixai unu de is mellus musunjus, s'erba merica. Imoi ndi teneus duas genias, sa "hunter river" e sa "doblone".
Seguramenti est su manixu printzipali de sa sienda, ki si biri de una bisura economiga, mancai in is urtimus annus, ki ant biu una grandu crisi de sa zoutenniga arrexonali, s'est tenta una calada de sa dimanda e nd'at sighiu una smengua de su pretziu de su produtu.
Su seminju si tenit in ladamini o in martzu, si du permitit su tempus, e is messaduras funt cincu de media, prus o mancu una in dogna mesi, intr''e maiu e cabudanni.
S'erba sicada s'imballat in ballonis cilindricus o ballixeddas retangularis.

Un'atru manixu meda impreau in is logus nostus, incapas su prus traditzionali de totu s'arrexoni (de is tempus de is arromanus antigus tzerriada a deretu "orriu de s'Italia") est su trigu.
Is campus nostus puru funt aconçus po du manixai, e istorigamenti si intreverat a manixus amellorantis cumenti is leguminosas (faixedda o pisurci).
Su trigu pigat sa prus parti de sa subrafaci siendali nosta, mancai siat truessendi issu puru tempus de crisi (si pensit ki su pretziu de bendida est prus basçu de su de bint'annus fait!).
Su seminju si tenit intr''e dognasantu e su mes''e idas, a pustis de medas traballaduras de sa terra, e sa messadura si tenit intr''e su mes''e lampadas e su mes''e arjolas.

Temporamenti, aici cumenti est ampita bona po kinisisiat ki tenjat mancai sceti un'uncueddu de terra, cuidaus un'ortixeddu, prus de totu a intr''e s'istadi, cun acuadura a stiddiu.
Po imoi est pitikeddu, ma no escrueus de du alladiai a subrafacis prus mannas ki e candu ant d'essi is cunditzionis po du fai.
Manixaus cun bonus arresurtaus unas cantu de bariedadis de ortalitzia (tamatiga, perdinjanu, crocoriga, cugumbiri, piberoni, latia, cançofa, fenugu, pistinaga, arreiga, apiu, faa, patata) e de spetzias (afabica, tzipiri, salvia, mairana, menta, perdusemini, arrucas).
Meda cuidau est su jardineddu a ingiriu de sa domixedda, cun cresuras de tzipiri e de murtauci.

No pagu incuru dedicaus a su vargereddu puru, ki a intr''e s'annu bolit medas traballus de pudatura de is matas e po ndi bogai s'erba.
Issu si sterrit in d-una subrafaci de prus o mancu 2000 mq i est ingiriau de frangibentu de olieddu, modditzi e figu morisca tipia.
Is matas andant de sa drupacea cumenti pressiu, piricocu e arguna bariedadi de pruna, a sa pomacea cumenti pira, mela e mela pironja, a s'agrumini cumenti aranju, mandarinu e mandarinu cabudraxu, po sighiri cun caki, nespula, arenada e figu 'era bianca e niedda, in prus de un'arringhera de axina.
Sigumenti est pitikeddu andat beni po unu cunsumu sceti de familla.